رانيا يوسف: بحط جاز في شعري.. ومينفعش أبقى كيوت لهذا السبب؟

ردت النجمة المصرية رانيا يوسف، على من كل من ينظر إليها من الخارج ويحكمون عليها بمجرد رؤية وجهها وملابسها التي ترتديها.

وقالت الفنانة يوسف، في لقاء تلفزيوني، مساء اليوم الجمعة: “طول الوقت بيتبصلي من برة، وبيحكموا عليا من لبسي مش شخصيتي. رغم إني حتى قبل ما أدخل الوسط الفني، بلبس على راحتي”.

وأضافت: “محدش كان بيقولي اللبس دا واسع دا مفتوح. لكن بعد كدا حصل تدخلات خارجية غيرت مفاهيمنا”، متابعة: “الشغل الزيادة بيفقد المرأة كل أنوثتها، يعني ابتديت أصحى الصبح ألاقي صوتي قلبّ راجل”.

وواصلت: “الوش الحقيقي بتاعي مبقاش موجود، وفي رجالة أنا بمشيهم في الشغل، ومينفعش أبقى كيوت”. مضيفة: “أنا مقتنعة إن اللبس حرية شخصية ومحدش ليه دخل بيها، ولا حد ليه حق يتدخل يقولي ألبس إيه، لأن ربنا خلقني حرة، واللبس على مزاج الناس حاجة مينفعش تحصل”.

وتابعت: “لو هعمل حاجة مجنونة، هحلق شعري زلبطة. نفسي أعمل كدا، لأن مفيش حاجة تكسرنا كستات”. مواصلة: “بحط جاز في شعري، لأنه بيقوي البصيلة وبينعم، دي وصفة جدتي، وبنصح كل الستات تعمل كدا”.

وذكرت: “أنوثتي من برة فقط، لكن الحقيقة من جوة مش كدا خالص. وأنا مبحبش الأوامر ومبحبش القهر، حتى في تعاملي مع بناتي سايبة ليهم الحرية المطلقة، بس في حد معين بنقف عنده ونتكلم فيه”، مضيفةً: “أنا متأثرة بأسلوب والدي وشخصيته في الالتزام والانضباط، وهو اللي معاه أسراري ومتفاهم معايا جدًا، رغم طبيعة شغله كونه رجل عسكري”.

وأكملت رانيا يوسف،: “الرجل اللي يملى عيني أهم ثلاث أشياء فيه، عقله وفكره وشخصيته أول حاجة، وكمان حنيته وكرمه، يعني دي حاجات أساسية”، مواصلة: “واللي معاه مفتاح قلبي لازم يكون عنده رحمة”.